नवनियुक्त शिक्षा, विज्ञान तथा प्रविधि मन्त्री कृष्णगोपाल श्रेष्ठले शिक्षा क्षेत्र सुधार्न सके राजनीति पनि सुध्रिने बताएका छन्।शुक्रबार सहरी विकास मन्त्रालयबाट शिक्षामा सरुवा भएका मन्त्री श्रेष्ठले आज आइतबार पदभार ग्रहण गर्दै भने, ‘मैले शिक्षकको रुपमा भूमिगत राजनीति गरेँ। राजनीति गरेरै मन्त्री भएँ। तर शिक्षकले राजनीति गर्ने भनेको विद्यालय बाहिर मात्र हो।’ राजनीतिकर्मीहरुलाई व्यंग्य गर्दै उनले थपे, ‘चारपटक एसएलसी फेल भएर पास हुन नसकेपछि राजनीतिमा लाग्ने अनि माइतीघरमा गएर भुइँमा बस्ने ! यस्ताले देश चल्छ ? देश बनाउन संयम चाहिन्छ। त्यागको भावना चाहिन्छ। निषेध, अपमान र विद्रोहले देश बन्दैन।’
शिक्षामा आफू नौलो भएकाले कर्मचारीको सहयोगमा अगाढि बढ्ने उनले बताए। ‘दुईजना सचिवले राजनीतिक आस्थालाई बाहिर राखेर सहयोग गर्नेमा म विश्वस्त छु,’ उनले भने।
पदभार ग्रहण गर्दै मन्त्री श्रेष्ठले प्राविधिक शिक्षा तथा व्यावसायिक तालिम परिषद् (सीटीईभीटी)को लामो समयदेखि विवादित उपाध्यक्षको सेवासुविधाको विषयलाई पूर्णता दिने कागजातमा हस्ताक्षर गरेका छन्। मन्त्रालयमा रोकिएका कामलाई अघि बढाउने र अघि बढेका योजनालाई पूर्णता दिने उनले बताए।
निवर्तमान मन्त्री गिरिराजमणि पोखरेलले सुरु गरेका राम्रा कामलाई अघि बढाउने वाचा उनले गरे। मन्त्रालयमा मन्त्रीको जिम्मेवारी हेरफेर भइरहने विषयलाई ठट्यौली पारामा उनले भने, ‘शिक्षा मन्त्रालमा मन्त्री हुने विषय मलाई पनि थाहा थिएन। सहरी विकास मन्त्रालयको प्लेन उडाइरहेको थिएँ। एकाएक टावरवाट ल्यान्ड गर्ने निर्देशन आयो, झ्याप्पै ल्यान्ड गरें। फेरि शिक्षा मन्त्रालयको अर्को प्लेन उडाउनुपर्ने भयो भनियो। अनि अब यसलाई उडाउने सुर कसेँ।’नवनियुक्त मन्त्री श्रेष्ठलाई शिक्षा मन्त्रालयका सचिव गोपी मैनाली र विज्ञान तथा प्रविधि मन्त्रालयका सचिव सञ्जय शर्माले स्वागत गरेका थिए।
नेकपा विभाजित भएर ओली समूह र दाहाल–नेपाल समूह अलग भएपछि शिक्षा मन्त्री गिरिराजमणि पोखरेलले राजीनामा दिएका थिए।
